Vídeo noticias de Asturias Verde 

Andecha Astur presenta les sos candidatures comu espresión xunitaria del nacionalismu asturianu
14-Abril-2015 Fuente nota de prensa de Andecha Astur.

Andecha Astur presenta les sos candidatures comu espresión xunitaria del nacionalismu asturianu y fai un llamamientu presona a presona pa sumar esfuercios y comprometese cola única candidatura nacionaliega.

Andecha Astur enfréntase a estes elleiciones nacionales cola concenxa bien clara de ser el referente xunitariu del nacionalismu asturianu y cola responsabilidá de garantizar la defensa de los drechos del Pueblu Asturianu.

El reencadarmamientu de la izquierda española alrodiu la franquicia mediática que representa Podemos, arrastró n’Asturies a seutores autonomistes/rexonalistes que se reivindicaben dientru’l nacionalismu, que siempres se negaron a participar en procesos de xunidá, y qu’agora enártense dientru la estructura centralista d’esa formación, pretendiendo que la sucursal n’Asturies de Podemos seya un referente pal nacionalismu asturianu.

Per otru llau Andecha Astur nun dubia en posicionase claramente col Pueblu. Los nuesos entamos idiolóxicos y el nuesu programa asítiamos nidiamente na izquierda, porque una sociedá xusta ya igualitaria namás pue defendese dende la izquierda. La estudiada ambiguedá de dalgunes nueves fuercies, que’l propiu sistema mos presenta comu alternatives renovadores, respuende a ún de los principios básicos del neolliberalismu, que ye afirmar la inesistencia de polítiques d’izquierdes y de dreches.

Asina mesmo consideramos que la ñegativa de Podemos a asumir la OFICIALIDÁ de la llingua asturiana comu mecanismu necesariu pa la normalización llingüística y democrática n’Asturies resulta inxustificable dafechu y pon n’evidencia el so fuerte componente españolista y la so falta respetu a los drechos democráticos y a los drechos nacionales asturianos.

Nesi sen, la so propuesta de reforma del Estatutu d’Autonomía del “Principado”, en cuentes d’apostar pol Drechu a Decidir, costitúi toa una declaración de sucursalismu españolista.

Ello asina, Andecha Astur reivindícase comu la organización xunitaria y referencial del nacionalismu asturianu, y fae un llamamientu d’urxencia al conxuntu del nacionalismu asturianu pa qu’asuma les sos responsabilidaes y xunza esfuercios con Andecha Astur, no que consideramos un puntu d’inflexón del panorama políticu que requirirá una necesaria ampliación de les bases sociales ya idiolóxiques del mesmu.

ANDECHA ASTUR - Organización política asturiana d'izquierda nacionalista


Artículos y temas relacionados

Sección noticias de Asturies

AsturiasVerde.com
Obra bajo una licencia de Creative Commons. Más datos en el vínculo de la licencia. Política de Cookies
Editor:
Antonio R. Dosantos. Contacto: C/ Carlos Albo 24 - 4ºB. 33430/Candás, Asturias. Tlf. 619538534.
redaccion@asturiasverde.com