Andecha Astur presentó les sos candidatures nacionales y de conceyu pa les prósimes elleiciones del 24 mayu
24-Abril-2015 Fuente: Nota de prensa de Andecha Astur.

Arriendes de presentase nes tres circuscripciones artificiales na que dixebraren Asturies elleutoralmente, Andecha Astur presentóse tamién en Xixón y n'Uviéu, sofitando y/o participando n'otres candidatures populares non sucursalistes comu son Conceyu Abiertu por Noreña, Asociación Morciniega Independiente o Pueblu, de Ribeseya.

Paulo Arboleya (Sieru) pela circuscrición central, Berta Labra (Cangues d'Onís) pela oriental y Antón Fuertes (Cangas del Narcea) pel ocidente, son los candidatos nacionales, y Sonia Díaz y Miguel Anxel Agudo per Xixón y Uviéu respeutivamente.

Tres l'esfarrapamientu del restu de formaciones que se definíen dientru'l nacionalismu / asturianismu, delles de les cuales integrárense en formaciones polítiques madrilanes con sucursal n'Asturies, Andecha Astur enfréntase a estes elleiciones cola concenxa bien clara de ser el referente xunitariu del nacionalismu asturianu y cola responsabilidá de garantizar la defensa de los drechos del Pueblu Asturianu.

Nesi sen Andecha Astur quier agradecer públicamente'l sofitu algamáu nestos díis por parte de presones non vinculaes a la organización, pero qu'asumen qu'agora mesmo la nuesa candidatura costitúi una candidatura de xunidá nacional na que ye preciso confluyir el conxuntu d'asturianos y asturianes que mos tengamos por talos.

Frente a tantu asturianu d'España, los asturianos d'Asturies.

Artículos y temas relacionados

Sección noticias de Asturias