Vídeo noticias de Asturias Verde 

Visitantes desde 11 Oct 2017
Free counters!

 

Ganemos Avilés n'apoyu a Día Lletres y a la reconocencia de la llingua
Un añu más celebramos les asturianes y asturianos la Selmana de les nuestres Lletres.
6-Mayo-2015 Fuente nota de prensa de Ganemos Avilés.

Un añu más en que l'apreciu pola nuestra cultura, pola espresión falada que los nuestros güelos nos treslladanon y la producción lliteraria que voluntariosamente sigue biltando s'impón a la situación sociollingüística llaceriosa qu'Asturies vien careciendo. Les disposiciones amenorgaes de política llingüística que los gobiernos autonómicos socesivos vienen calteniendo enfótense n'operaciones de tramoya y maquillaxe qu'escuenden la realidá más murnia y al par más evidente: la desapaición progresiva del asturianu.

Inútiles pa los políticos que nos rixen dan en ser la opinión popular, los estudios científicos, los llamaos internacionales, el sentíu común mínimu y la sensibilidá consabida polos derechos humanos. La falta d'una planificación sociollingüística seria y decidida que trabaye en cuidos d'una normalización de la llingua asturiana y del gallego-asturianu na nuestra comunidá afala a la reversión inevitable del nuestru patrimoniu glósicu.

Celebraremos con allegría y arguyu la nuestra Selmana, sí, fairemos d'ella un nuedu de convivencia y solidariedá; pero ello nun nos va anubrir el panorama neciu nel que la clas política llariega nos conderga a la precariedá cultural y a la indefensión ciudadana (como en tantes otres estayes). Dende la candidatura d'unidá popular avilesina "Ganemos Avilés en Común" pidimos a la ciudadanía que participe nos actos culturales de la nuestra Selmana, pero tamién que reclame con rixu l'estatus de reconocencia oficial pa les nuestres llingües que cuantayá se nos vien negando. El vienres 8 de mayu, Día de les Lletres Asturianes, ellí nos veremos, con puxu, con dignidá y con amor, nel actu del teatru Campoamor de l'Academia de la Llingua Asturiana y na manifestación pola Oficialidá de la Xunta pola Defensa de la Llingua Asturiana peles cais d'Uviéu.

GANEMOS AVILÉS EN COMÚN.


Artículos y temas relacionados

Sección Avilés y comarca

AsturiasVerde.com
Obra bajo una licencia de Creative Commons. Más datos en el vínculo de la licencia. Política de Cookies
Editor:
Antonio R. Dosantos. Contacto: C/ Carlos Albo 24 - 4ºB. 33430/Candás, Asturias. Tlf. 619538534.
redaccion@asturiasverde.com